Taranaki Herald
Ko te Taranaki Herald te nūpepa tuatahi kia tāngia i Taranaki. Ko Nū Pāremata te whakamutunga o ngā nohanga Pākehā o aua wā ki te whiwhi i tōna nūpepa ake.
Nā William Collins rāua ko Garland William Woon te Herald i tīmata. Ko te putanga tuatahi i tāngia i te 4 o Ākuhata o te tau 1852. Nō te tau 1867 ka hokona ai ki a Henry Weston. Ko ia anahe te rangatira tae noa ki te tau 1920. He pānga o te maha o ngā mema o te whānau Weston ki te nūpepa mō te roanga ake o tōna wā.
He rite te Herald ki ētahi atu o ngā nūpepa o waenga o te rautau mai i 1800, i tōna urunga ki ngā tūmomo tautohetohe. Nō te tau 1854, ka tukua ai e William Crompton tōna tūnga ētita tuarua nō te kaha o te whakapae ki ana whakaaro i tuhia ki te nūpepa, pērā me tana whakahē i te moenga o te Māori ki te Pākehā. I ngā pōti porowini o te tau 1857 ka nukuhia te tautoko a te Herald mai i te Kaiwhakahaere o te wā, Charles Brown, ki tōna tāwhainga ki a George Cutfield. Ka riro i a Cutfield te pōti, ko te whakaūtunga i te Taranaki News hei tāwhainga i te Herald te whakautu a Brown. Ko te ētita o te Taranaki News te ētita o mua o te Herald, Richard Pheney. Ko te take i puta atu ai a Pheney i te Herald, nō te katinga o te tautoko i a Brown.
Nō te tau 1875 ka tīmata ai te Herald ki te tā i te Budget and Taranaki Weekly Herald. Ko tā te Budget he whakarato i tētahi whakarāpopotonga ia wiki i ngā kōrero i kawea e te Herald, ā, ko ōna kaipānui ngā mea noho matara e kore ai e taea te nūpepa ia rā. Ka tāngia ai te Budget tae noa ki te tau 1932. Nō te tau 1877 ka puta ai te Herald ia rā, nō ngā tau e rua o mua i pērātia ai te Taranaki News.
Nō te katinga o te Lyttelton Times i te tau 1935, ko te Herald te nūpepa kaumātua o te motu. Nō te tau 1962 ka honoa ai ki tōna tāwhainga tūroa te Taranaki News (ko te Daily News ki tēnei wā). He mahitahi i te katoa o ngā rauemi engari he tīma motuhake o ia nūpepa mō te mahi ētita. Puta atu ai te News ia ata, te Herald ia ahiahi.
I ngā tau mai i 1970 ki te 1990, ka kaha atu te uaua o te whakaputa nūpepa ahiahi i Aotearoa. Ko te Herald tētahi i pērātia, ka katia ai i te tau 1989.
