PAPERSPAST

Nā tētahi tangata nō Ahitereiria nā Charles de La Roche te niupepa i tīmata i te tau 1901. I muri i tāna hounga tuatahi ki ngā mahi pupuri niupepa, arā i te Tauranga Herald i ora mō te wā poto noa iho i te tau 1899, ka nuku ia ki Warkworth, ā, he tere tonu tana whakatū umanga hoko whenua, hoko kāinga whai painga. Ka hokona e ia tētahi niupepa āhua korekaha, e kīia nei te Gazette, tōna tikanga hei niupepa mō ngā rohe o Waitemata me Kaipara, ā, ka whakamahia e ia tāna mīhini tā hei whakarewa i te niupepa tuatahi o Warkworth. Ko te taitara ko te Rodney and Otamatea Times, engari ko te taitara o raro ko te Waitemata and Kaipara Gazette, e whakaaro ai pea te tangata i te wawata a de La Roche kia kitea he kaipānui i taua takiwā. Hei whakararu pea i tāna mahi, kāore he kupu kotahi i te putanga tuatahi mō tētahi o aua rohe e rua.

He rau whānui, he whā whārangi hoki te niupepa ā-wiki Rodney and Otamatea Times, i tāia ki tētahi mīhini pāraharaha Furnival. Tokorua ngā kaimahi mahi harangotengote i kawe ngā mahi hurihuri ā-ringa i te wīra nui, i te kaitā e whāngai ana i ngā pepa niupepa pātea ki roto i ngā rango. Puta ai te niupepa ia Paraire, ko te utu he 3d (toru kapa) mō te kape kotahi, ko te utu ā-tau e waru herengi. Ka piki te ingoa o te Times mō ana mahi kawe kōrero me āna whakaputanga kupu mō ngā take o te rohe, engari kāore i tino nui ngā kōrero mō ngā mahi hākinakina mā te hunga ngākaunui ki ēnā mahi.

I muri i te hokonga a de La Roche i te niupepa ki A H Mason i ngā marama whakamutunga o 1903, ka tupu tuawhiti tonu āna mahi hoko whenua, hoko rawa. Nō muri ka noho ia hei ētita mō te Manukau Gazette i Onehunga i tuku ai ia i tana tūranga, ka mate rawa i te tau 1938.

Arā atu anō ngā rangatira o te Times i mua i te hokonga o te pepa e tētahi kaitā nō Wairarapa e William Cook i te tau 1917, i tīmata ai tētahi umanga tā niupepa tuku iho i toitū tonu mō te 88 tau. I noho tonu ko William Cook te ētita taea noatia tōna matenga i te tau 1942. Ka piki tana tama a Elsley, he kaimahi pēke i mua, he toa tū taua i te Pakanga Tuatahi o Te Ao, ki tōna tūru ētita, kaiwhakahaere hoki i te kamupene. Nō muri i tana matenga ohorere i te tau 1955, e 62 ōna tau, ka eke tāna wahine a Marjorie ki te tūnga kaiwhakahaere i te kamupene tae noa ki 1976. I huri ia ki te hoko i ētahi pepa tauwhāinga e rua, ā, i tū pakari hoki ia ki te ārai i tētahi kōkiri hoko i te umanga nā Wilson and Horton. I riro nā tā rāua tama, Tony Cook, i whakahaere te kamupene hei kaihautū whakahaere, ā, ka hurihia e ia ki te tikanga web-offset, nā ana mahi i tino whanake nui ai ngā mahi tā arumoni o te kamupene. I huri te Times mai i te tētahi niupepa utu ā-tau ki tētahi niupepa tuari utu-kore.

Nō te tau 2005 ka hokona e te whānau Cook te niupepa rua-wiki o te Rodney Times ki Fairfax New Zealand.