PAPERSPAST

I puta te putanga tuatahi o te Ohinemuri Gazette o Paeroa i te Hātarei, te 19 o ngā rā o Tīhema 1891. E rua rawa ōna putanga ia wiki, i Hātarei, ia Wenerei hoki, i te ata, ā, he mea tā ā-ringa ōna reta.

I tae mai te kaiwhakatū o te nūpepa a Edwin Edwards ki Paeroa i ngā tau tuatahi mai i 1880, ā, i tīmata tāna mahi nūpepa ki te whakatū i te Gazette i te taha o J.H.Moore me H.C. Wick, ā, nō te tau 1896, ka whakatūria e ia Te Aroha Times and Waiorongomai Advocate, i te taha o J.W. Parry. He kaimātai whenua kore-utu noa ia, ā, tērā anō te wā nōna tētahi wāhi o te keringa nui o Waihī, he tangata i hautū i ngā mahi o te rohe, he tautitotito ruriruri, ā, he maha ōna ruriruri i puta i te Ohinemuri Gazette.

I riro te mana pupuri i a William Dennis Nicholas rāua ko Henry Howard Lyes (i tukua e ia tōna tūranga i te tau 1901). Ka hurihia e Nicholas te āhua o te Gazette hei pepa mō te ahiahi, e toru ōna putanga i te wiki.I kainga ngā tari o te Gazette i Wharf St e te ahi i te tau 1908, heoi anō, ka puta haere tonu (he mea tā e te hunga nō ratou te Waihi Times). Ka whakatuwheratia ētahi whare tā i Princes St, ka whakaurungia he mīhini tā hōu ki roto.

Nō te tau 1896 ka haumitia te Hauraki Tribune ki roto i te Ohinemuri Gazette, ā, nō te tau 1921 ka hurihia te ingoa ki te Hauraki Plains Gazette.

Ka haumitia mai te Hauraki Plains Gazette ki roto i te Thames Valley Gazette i te tau 1977, me ētahi atu nūpepa ā-rohe e rua, ā, ka kīia i muri ko Paeroa Gazette i te tau 1988. Ka haumitia mai tēnei ki te Thames Star i te tau 1998, ka kīia ko Thames Valley Gazette, engari kāore i eke ki te tau te oranga o te nūpepa hou.