PAPERSPAST

I ngā tekau tau mai i 1880 me 1890 i whakaaro ētahi kaiwhakaputa o Niu Tireni i konei he mākete mō ētahi hautaka e kaingākautia ana e te marea, he kaha te arotahi ki ngā take o te wā kāinga. I tāia ki ngā tāone nui ētahi tānga, tae atu ki Zealandia (1889), ki Citizen (1895), ki Critic (1899). Kīhai te kotahi o ēnei i kake, i āhua tūroa rānei. Ko te mea hiranga tonu o ēnei hautaka ā-rohe ko te New Zealand Illustrated Magazine.

I whakaputa ā-maramatia ai te Illustrated Magazine i Tāmaki-makaurau mai i te tau 1899 ki te tau 1905. I kawe hoki i ngā takohanga tuhituhi a ngā kaituhi rangatira o Aotearoa o te wā, tae atu ki a Apirana Ngata, ki a Jane Mander, ki a James Cowan me Elsdon Best. I whakaaturia hoki te whiti, te pūrākau poto me te tuhinga whakamārama, ā, i whakaahuatia nuitia e ngā momo tāngata pērā me Frances Hodgkins, me Kennaway Henderson hoki.

I whakamātau te Illustrated Magazine ki te whakataetae ki ngā momo hautaka rite nō tāwāhi, pērā i te Strand me te Bulletin, engari kāore i toa. He mea whaitake tonu te whaikupu he aha i kaha kē atu ai te pīrangi o te iwi whānui o Aotearoa ki ngā momo o tāwāhi i ērā o te kāinga. Tērā pea kāore i eke rawa te kotahitanga-ā-iwi o te iwi kōrero pukapuka ki tā ngā kaiwhakaputa i whakaaro ai, ā, tērā anō pea ki a rātou i pai kē atu, i ōrite rānei, te whakapuakanga a ngā hautaka o Ingarangi, o Āhitereiria hoki i ō rātou ake whakaaro i tā ngā hautaka kāinga whakapuakanga. Tērā tonu pea i mate anō hoki ngā hautaka o Niu Tireni i te tauwhāinga atu ki ngā nūpepa kāinga, ina koa ngā tānga ā-wiki whai whakaahua, pērā i te Free Lance me te Weekly News. I āhua rite ngā kōrero o ēnei pepa ā-wiki ki ō ngā hautaka pērā i te Illustrated Magazine, ā, tae rawa ki te mutunga o te rautau tekau mā iwa kua tino ū ēnei pepa, kua tino kaingākautia hoki e te iwi whānui.