PAPERSPAST

He kaitā pukapuka, he tangata kaipakihi a William Chisholm Wilson. Nō te tau 1863 ka wehe atu ia i tōna pātuitanga i te niupepa te New Zealander, tētahi pepa whai mana, kia pai ai tana tīmata i te Hērara o Aotearoa, arā, te New Zealand Herald. He mārama tonu tāna kaupapa-here mō ana tuhituhi - kia paiheretia ngā moutere e rua, Te Ika-a-Māui me te Waipounamu, kia tika ai ngā mahi. Tētahi atu take, kia kaha te pakanga a te taha Pākehā ki te Māori, arā, e ai ki Te Hērara, ko te 'native rebellion’ tērā o tērā wā - engari ko te whāinga matua o Wilson he arumoni kē, ki tāna i matapae ai, tērā te hua o te moni i te pikinga o te taupori o Tāmaki-makau-rau i roto i ngā tau.

Ahakoa i kati te New Zealander i te tau 1866, ka noho ko te Daily Southern Cross hei hoa whakataetae mō ētahi tau, otirā i tino pērā i te hokonga a Julius Vogel i te nuinga o ngā hea i te tau 1868. Nō te tau 1876, ka hoko a Alfred Horton i ana pānga i te Thames Advertiser. He kaikawe kōrero, he kaitā pukapuka a Horton. I muri ka hokona e ia te Daily Southern Cross a Vogel, i te hē haere ngā pūtea o taua pepa i taua wā. Kāore i roa i muri mai ka mate a William Wilson, ā, nō te tau o muri mai ka haumi ngā tama e rua a Horton rāua ko Wilson i ā rāua pānga - ka puritia kia ora ko ngā upoko niupepa pakari anake. Ka horomia te Daily Southern Cross e te New Zealand Herald, ka horomia te Weekly Herald e te Weekly News.

Nō te mutunga o ngā tau mai i 1870, ka noho ko te niupepa nui ko te New Zealand Herald, i ngā ata, ā, hei ngā ahiahi ko te Auckland Evening Star (nō muri ka kīa ko te Auckland Star). He reo pupuri tikanga i ngā wā katoa te New Zealand Herald, ā, nā te Evening Star i tautoko te kōkiri tōrangapū kia whakangāwaritia ngā take me ngā āhuatanga katoa.

Nā runga i ngā āhuatanga hangarau huri hohoro a Alfred Horton, ka whakaurua te mīhini tā hurihuri tuatahi e Wilson rāua ko Horton i te New Zealand Herald i 1883. Nō muri mai ko te mihini tukutuku o 1887, me te mīhini tā rārangi i te tau 1898. I 1909 koia hoki te niupepa ā-rohe tuatahi kia whakaputa i ngā pānui hokohoko, i wehea ai ngā hua hoko me ngā ratonga, tēnā, tēnā, ki tōna karangatanga, ki tōna karangatanga.

I whai wāhi anō hoki a Horton ki te whakatūranga o te NZ Press Association i te tau 1878, i tīmata ai te tiritiri i ngā rongo kōrero huri noa i ngā mema niupepa, me te whāngai mai i ngā pitopito kōrero mai i tāwāhi. I te tau i muri mai ka āwhina ia ki te whakatau i ngā raruraru ki tētahi tari tauwhāinga, i tūhono ai ngā mahi a ngā whakahaere e rua i raro i te United Press Association. Ka hoki anō te ingoa ki te New Zealand Press Association i te tau 1942.

Kāore i rerekē te āhuatanga o te New Zealand Herald i te takanga o te hia ngahuru tau, mau tonu tōna āhua whakakaumātua, ōna whakaaro tū-ki-matau. Ko te whakatinanatanga o tēnei ko ngā pakiwaituhi pupuri tikanga a Gordon Minhinnick. Ko te ingoa whakawai ko 'Kui Hērara', he mihi tētahi wāhi o taua ingoa, he hōhā tētahi.

Ka huri te New Zealand Herald hei kamupene tūmatanui i te tau 1925, engari i puritia te nuinga o ngā hea e ngā whānau Wilson me Horton, tae atu ki ngā tūru kaiwhakahaere katoa. Nō te tau 1996 ka hokona e te Independent News & Media Group, nō Paraini i Airani, ngā hea o te whānau Horton. Ko te rangatira o nāianei o taua niupepa ko Australian Provincial Newspapers (APN), he pekanga nā Independent News & Media.