PAPERSPAST

Ko te New Zealand Gazette te nūpepa tuatahi ki Aotearoa. I tā tuatahitia te Gazette ki Rānana i raro i te mana o te Kamupene o Niu Tīreni i te 21 o Here-turi-kōkā 1839. I whakaputahia he putanga whakahoua rua wiki ki muri. Ko te putanga tuarua i tāhia i te 18 o Paenga-whāwha 1840 ki Te Whanga-nui-a-Tara, ā, koia te nūpepa tuatahi i tāhia ki Aotearoa.

He maha ngā huringa o te ingoa o te Gazette i te tau 1840. I te marama o Here-turi-kōkā i tāpirihia mai te ingoa ‘and Britannia Spectator’; ko ‘Britannia’ te ingoa i whakaarohia mō Te Whanga-nui-a-Tara. I Whiringa-ā-rangi ka huri te kupu ‘Britannia’ ki ‘Wellington’.

I te tuatahi nā Samuel Revans te nūpepa, ā, ko ia te etita hoki, engari e whakapaehia ana koinei te waha kōrero mō te Kamupene o Niu Tīreni. Nāna i tautoko i te Kamupene i ana raruraru me ngā kaiwhakahaere taiwhenua i Tāmaki-makau-rau. Nā te kaha o tana whawhai me ngā hoariri o te Kamupene, ka whakakairirihia e te iwi whānui, ā, nā tēnei i te tau 1842 ka tīmatahia e ngā tauiwi he nūpepa hou i Te Whanga-nui-a-Tara, arā, te New Zealand Colonist and Port Nicholson Advertiser.

I taumutu te Gazette i te marama o Mahuru 1844. Nō ngā wiki i muri mai i tīmata te New Zealand Spectator and Cook’s Strait Guardian, ā, i whaimahi ai ngā kaitā o te Gazette i tēnei nūpepa hou.