Free Lance
Ko te Free Lance tētahi o ō Niu Tireni nūpepa ā-wiki whai whakaahua i tino kaingākautia. I whakaputa tuatahitia e Geddis rāua ko Blomfield i Te Whanga-nui-a-Tara i te tau 1900, hei wāhanga motuhake o tā rāua nūpepa ā-wiki angitu o Tāmaki-makaurau, te NZ Observer and Free Lance. Ka wehea te ingoa e ngā kaiwhakaputa, ko tō te Tāmaki-makaurau nūpepa e noho ana ko te NZ Observer, me tō Te Whanga-nui-a-Tara nūpepa e tango ana i te ingoa o Free Lance.
Ahakoa tōna whakahoatanga ki te Observer i te tīmatanga, kāore i roa kua whanake te Free Lance hei pānuitanga wehe kē me te whānau o ngā Geddis e aro kē ana ki te Free Lance, ko Blomfield ia ki te Observer. Nō muri mai ka noho tonu nō tōna takatā, nō James McRobert Geddis (1856-1935) anake te nūpepa, ā, i te tau 1920 ka whakatūria e te whānau o ngā Geddis he kamupene tūmataiti hei whakahaere i te nūpepa. I whai wāhi tonu te whānau o ngā Geddis ki te whakahaerenga o te Free Lance tae noa ki tōna komokomonga ki te New Zealand Weekly News i te tau 1960. I tōna matenga ka noho ko te Weekly News anake te nūpepa ā-wiki whai whakaahua i Aotearoa.
He tānga tikanga noa te nūpepa ā-wiki, te Free Lance; he haratau ana kōrero, he mea rīroa me te nui o āna kōrero e aro atu ana ki ngā ariki taipuru o Ingarangi, ki ngā tirohanga o Niu Tireni, ki te hunga rangatira o te pāpori, ki ngā hākinakina anō hoki. I mōhiotia whānuitia mō āna waituhi whakakata tōrangapū. Whakaatu hoki ai i ngā mahi a ētahi kaitito waituhi whakakata pai rawa o te whenua, tae atu ki a John Gilmour, ki a Gordon Minhinnick, ki a Tom Ellis (Tom Glover), ki a E.F. Hiscocks, me Stuart Peterson. I waimarie tonu te Free Lance ki te tīmata i tana mahi whakaputa i te wā tonu i puāwai mai ai te pūmanawa waituhi whakakata i te wā kāinga. Kīhai te Free Lance i whaihua noa iho i tēnei āhuatanga, engari i hiranga tonu ana mahi whakatairangi i ēnei pūmanawa me te whakatairangi kapikapi i te mahi whakaputa hautaka whai whakaahua.
