New Zealander
Nā John Williamson te New Zealander i tīmata hei nūpepa ā-wiki i te tau 1845, koia rā te nūpepa tino whakataetae i te Southern Cross. Ko ēnei noa iho ngā nūpepa i tū i ākarana mō tētahi wā i mua o te tau 1860.
I tīmata te New Zealander i te wā o te toimahatanga nō muri mai o te pakanga ki a Hone Heke i te Taitokerau. Ko tā te nūpepa he whakaatu i ngā take o te tangata whai pānga iti me te Māori. Ki te New Zealander he kaha tonu te whakapāohotanga o ngā whai pānga a ngā rōpū rapu whenua nui atu e te Auckland Times. Inā te korokē, nō muri tata noa mai o te tīmatanga ki te whakaputa i te New Zealander i te marama o Pipiri 1845, ka katia ai te Times.
Ka whakatārewatia te Southern Cross i te tau 1845, tukua ana te New Zealander kia haere kore whakataetae tae noa ki te tau 1847, arā, te tau o te whakaaranga ake o te Southern Cross. E rua whakaputanga ki te wiki te whakautu a te New Zealander. I te tau 1848, ka tīkina e Williamson ko William Chisholm Wilson hei hoa kaipakihi.
Ka tupu haere te whaimana o te nūpepa. Tae rawa ana ki te tau 1859 koia te tino nūpepa o Aotearoa, ā, i te tau 1863 ka puta ia rā, ia rā. I taua tau anō ka raru te hoa pakihi i te pakanga ki te Māori. Kīhai a Williamson i tautoko, ēngari a Wilson. Ka wehe atu a Wilson ki te whakatū i te New Zealand Herald, ka noho tonu a Williamson anahe hei rangatira.
Ka whakahēngia te New Zealander i āna whakapuakitanga mō te pakanga. I te marama o Pipiri i te tau 1864 ka whakawehia mai e rima tekau o ngā heremana mai i te HMS Esk ki te turaki i te tari o te nūpepa nō muri mai o te puakitanga e tētahi o ngā kairīpoata a te nūpepa nā te whakarerenga o āna hōia i mate ai a Kāpene Hamilton i Pukehinahina. Kīhai a Williamson i whakapāha, ēngari i tukua kia tāngia ki tana nūpepa ētahi kupu tātā mai i ngā heremana.
Ki tēnei wā ka kore haere te tautoko mai me te whaimana o te New Zealander. Ka whakatūpatotia te tauawhi kaupapa Māori, ēngari taea te pēwhea. Tae noa ki te tau 1865 kāore i taea te whakaputa ia rā, ka hoki kē ki ngā putanga e rua ia wiki. I te marama o Haratua i te tau 1866 nō te kānga o te tari i te ahi, ka kore te nūpepa.
He tauira pai te New Zealander me te Southern Cross o te ū a ngā nūpepa o te motu ki te tōrangapū i taua wā, ā, he pērā rā anō ki ētahi atu tāone o Aotearoa.
