PAPERSPAST

E whakaarotia whānuitia ana he putanga hiranga nui te Maoriland Worker ki te kaupapa reipa o Aotearoa. I te tīmatatanga o te rautau rua tekau e rua ngā peka o te kaupapa reipa – ko te hunga e whai ana i te pāhoro, me te hunga e whai ana kia whakahoutia ngā tikanga, i whakaritea hoki e ia rōpū he putanga hei whakaata, hei whakaputa hoki i ō rātou tirohanga ki te ao. Kāore i uru pai ngā kaiuniana kaitaua ki raro i ia o aua karangatanga. Nā te kaha pēhi, whakahē hoki o ngā niupepa i a rātou i muri i tētahi tautohe utu i te tau 1910, i whakatauhia e te Shearers' Union i Ōtautahi kia tīmata i tā rātou ake pepa, Te Maoriland Worker hei putanga ā-marama. I whakaputaina te niupepa i Ōtautahi mō te wā poto, i reira i tino kitea ngā mahi a Ettie Rout me Alexander Wildey. I te whakakotahitanga o te uniana kaikutikuti hipi ki te uniana kaimaina, kua noho te pepa hei kanohi mō te Federation of Labour 'Whero', ā, i te tīmatatanga o 1911, i nekehia tana tari whakaputa ki Te Whanga nui ā-Tara.

I raro i te ētitatanga o Bob Ross nō Ahitereiria, he tere te tipu o te niupepa, he mea whakaputa ā-wiki ināianei, i runga i te nui o ngā kaipānui, i runga hoki i te kaha o tōna awe. I te tau 1912, 8,500 ngā kaipānui, ā, 10,000 i te tīmatatanga o te tau whai muri mai. Me kī ko te pokapū tērā o te Federation mō te akiaki i te mana hapori. E rikarika ana ngā kaiuniana kia tū hei 'paper boy', he whatunga kairīpoata tūao hoki tō rātou puta noa i ngā motu. I te tino taunaki te kaupapahere ētita a te Maoriland Worker i te unianatanga ahumahi, te mahitahitanga a ngā kaiuniana puta noa i te ao, me te whakamārietanga.

I eke ngā tikanga tārei i te Maoriland Worker i runga i tētahi paerewa ngaio teitei tonu, tae atu ki ētahi o ngā pakiwaituhi tōrangapū tīwharawhara hoki o te wā. I wehe atu a Ross i te tau 1913, nō muri mai i whiwhi i tana whakakapi a Harry Holand te tūranga o te kaitātaki o te Labour Party. I hāmenetia a Holland mō te mahi whana kāwanatanga mō tana rīpoata i tētahi tautohenga wāpu i huri hei taraiki whānui i te mutunga o te tau 1913. I whiua a ia ki te kotahi tau i roto whareherehere, engari i mauheretia mō te toru marama noa iho. Nō muri tata i pakaru mai te pakanga, ko te tū a te Maoriland Worker ko te tū a te kaikōkiri mana hapori ā-ao, i puta hoki ngā matapae a Holland i ngā kōrero ētita mō te ekenga o te pāhoro ā-ao. I wehe a ia i te pepa i te tau 1918 i tana pōtitanga ki te Whare Pāremata i tētahi pōtitanga-iti.

He kaha tonu te whakaputa a ngā tirohanga wāwāhi tikanga puta noa i ngā tau o te pakanga tae atu ki ngā tau tuatahi o ngā 1920. I waenga i ngā tau o te pakanga i pēhingia hoki te niupepa e ngā utu kupu whakakino, te aukatinga me te inonotitanga pirihimana. I te tau 1921 i tāngia e te Maoriland Worker ētahi ruri nā te kaitito rongonui Peretania o te pakanga a Siegfried Sassoon. I kitea e ngā mana o te wā ngā raina e toru o 'Stand to: Good Friday Morning’ i hāmenetia te kaiwhakaputa o te pepa mō te 'kupu whakakino kohukohu'. I whakawāhia a John Glover i te Supreme Court i te tau 1922, koira anake te momo kēhi pērā i te hītori ture o Aotearoa. I tū te whakawā i tētahi wā ko te pēhi i te hunga whakararu i ngā wā me ngā wāhi ka taea te mahi, ā, i te aro kē ngā kaitōrangapū ki te pupuritanga o te 'raupapa pāpori', ko te hāhi tētahi wae tino nui o tēnei momo mahi. I wetea a Glover i te whakapae, engari i tāpirihia atu e te tekau mā rua he kōrero ki tana wetenga e kī ana e tika ana kia whakapāhunu i aua momo tuhinga.

I te tau 1924, i hurihia te ingoa o te putanga ki te New Zealand Worker. I huri hoki te taitara-roto. I huri mai i te kōrero 'He hautaka o te unianatanga ahumahi, te mana hapori me te tōrangapū' ki 'He pepa nō Aotearoa mā ngā tāngata o Aotearoa'. Ahakoa i te whai pūtea tonu te putanga i ngā uniana, i te noho tonu te mana whakahaere i te Rōpū Reipa. He tere, he nui hoki te heke o te mahi wāwāhi tikanga i a te Labour Party e whai ana kia tika tō rātou āhua ā-tōrangapū.