PAPERSPAST

Nā Alexander McMinn, te kaiwhakaputa o te Rangitikei Advocate, i whakarewa te Manawatu Standard i te tau 1880 hei nūpepa whā whārangi mō ia rā, i runga i tana hiahia ki te whakatū nūpepa māna ake, ā, koinei hoki te nūpepa tuatahi i Pāmutana. I puta te putanga tuatahi i te 29 o Noema 1880, ā, i reira ētahi tuhinga nā John Ballance.

Nō te pikinga ake o ngā tāngata hoko i te nūpepa (i kīia kei te 1,500 i te tau 1881), nō te pakari haeretanga hoki o ngā hangarau, i runga i te whakamahinga o ngā mīhini tā ā-mamaoa, hei whakakapi i ngā mīhini tā ā-ringa, ka tīmataria he putanga mō te tāone, he putanga hoki mō te tuawhenua. Ka nui te tautohetohe o tēnei nūpepa ki tōna hoa tauwhāinga ki te Manawatu Times.

Nā ngā tuākana tēina, a Frederick rāua ko David Pirani i hoko i te tau 1891, ka hurihia hei nūpepa mō te ahiahi. Nā Martha Pirani, te hoawahine o Frederick, i tuhi tāpaetanga whakaaro mō te nūpepa. He āhua Rīpera Motuhake tōna anganga tōrangapū, ā, i tiria ki ngā rohe o Manawatū, o Heretaunga, o Taranaki. Ko tētahi take i painga ai ia, ko ōna pānui hoko kararehe. I wikitōria a Frederick i te tūru o Pāmutana i te pōtitanga o te tau 1893, ā, ka noho i taua tūru taea noatia te tukunga i tōna tūranga i runga i te māuiui i te tau 1902.

I hokona atu te Manawatu Standard ki a John Coombe rāua ko Norman Henry Nash i te tau 1903. I whakanuia e te Standard tōna Tiupiri Kōura i te tau 1930, ki tētahi putanga motuhake. Ahakoa ngā rerekētanga o te hunga pupuri i te nūpepa, ka whakaputaina tonutia taea noatia te rautau 21.