PAPERSPAST

I tīmatahia te tānga nūpepa i te takiwā o Foxton i te tekau tau mai i 1870 i te whakapūaretanga o Manawatu hei nohanga Pākehā. I whakawhanaketia te poi o Foxton i tēnei wā, ā, nā te kōti, nā te tereina hoki i hono ai te tāone ki ngā tāone mātua o te Ūpoko o te Ika a Māui.

Nā te tuakana a George Warren Russell rāua ko te teina a John Ruffell Russell te Manawatu Herald i whakaū i 1878. Koia te nūpepa tuatahi i tāngia ki Foxton, i muri i ngā whakamātauranga huakore ki te whakaputa i tētahi nūpepa i huaina te Manawatu Guardian i te tau 1873. Kua mahi kē a George Russell i ētahi nūpepa i Waihopai (Invercargill) me Pōneke, ā, i haere tonu ki ētahi atu mahi ai pērā i te Spectator i Otautahi. He mema whakarae anō ia o te Whare Pāremata, he minita hoki o te Rūnanga o te Kāwanatanga i te wā o te Pakanga Tuatahi o te Ao

Kāhore tonu i roa te noho a George Russell ki te Herald. Tae ana ki te tau 1882 kua neke kē ia ki te Manawatu Times i Te Papaioea (Palmerston North), mahue ana tana teina i te nūpepa i Foxton. I hokona te Herald ki a Ernest Thynne i te tau 1889. I a Thynne te pupuritanga, he tāwhai tautohenga tō te Herald, arā, te Foxton Telegraph, he nūpepa i haere tonu e whā ngā tau mai 1896. Te āhua nei nā te kaunihera ā-rohe te Telegraph i āki, i tā rātou wāwāhitanga i ngā pānui kaunihera i waenganui i te Telegraph me te Herald. I heipū pea tēnei āhuatanga i te mea hei kanohi a Thynne me te Herald mō te rōpū pōti taiwhenua o Foxton.

I te tau 1906 ka hokona te nūpepa e Thynne ki a John Knowles Hornblow. Nō tētahi whānau kaituhi nūpepa a Hornblow. I tuhi tōna pāpā mō te New Zealand Times, ko Hornblow rātou ko ana teina hoki i mahi mō ētahi nūpepa i te Wairarapa. Nō Hornblow hoki te Wairarapa Standard i mua i tana taumanutanga i te Herald.

I te taumanutanga o Hornblow i te Herald, he tāone whai tūmanako a Foxton. Tēnei ake ngā kaupapa hei whakarahi i te poi, ā, i tūmanakohia ka haere rā Foxton te ararōau matua. He mea whakarapa tonu i ngaro ai ēnei tūmanako i roto i te kotahi tau, rua tau rānei. Kāhore i neke whakamua te whakawhanaketanga o te poi, ā, i karo te rerewē i whakaotia i te tau 1908 i a Foxton. Ahakoa rā, āhei ana i a Hornblow rāua ko tana tama a Rōpata, kia haere tonu te Herald, ko Rōpata anō te taumanu ana hei rangatira i muri i te matenga o tōna pāpā i te tau 1937. He maha tonu ngā whakawhitinga ringaringa i mua o te whakamututanga i te tau 1997.

I te tīmatanga e rua ngā tānga i ia wiki, ā, ka nekehia kia toru ngā tānga i ia wiki i te tau 1890, hoki ana ki te rua rā i ia wiki i te tau 1944, kātahi ki te tānga ā-wiki mai i te tau 1956. I whakawhitia te ingoa ki te Foxton Herald i te tau 1955, ā, i hoki anō ia ki te Manawatu Herald i te tau 1961.