PAPERSPAST

Nā Te Mākarini (Sir Donald McLean) te whakaaro tuatahi kia tuhia he nūpepa hei whakapāho atu i te kaupapa kia wehe mai te rohe o Kahungunu ki Heretaunga mai i te porowini o Pōneke. Ko Te Mākarini hoki tētahi o ngā tangata tuatahi i noho ki te takiwā hōu i karangatia ko Ahuriri i taua wā. Ko tētahi anō o Hōpara i ngā pānuitangata tuatahi i noho i reira ko James Wood, ā, nāna i whakaputa mai i te putanga tuatahi o te nūpepa i Ahuriri i te 24 o Mahuru i te tau 1857. Ko te nūpepa nei ko Hawke's Bay Herald and Ahuriri Advocate.

Nō te kaha pai o te whakahau kia tū a Kahungunu ki Heretaunga he rohe wehe, ka tū taua rohe nā ki runga ake i tāna mana motuhake i te tau 1858. Ka riro ko James Wood te Kaitā o te Kāwanatanga mō ngā porowini. Ka riro hoki mā te Herald e whakaputa i ngā pānui o te Kāwanatanga. I tēnā nā, ka makere ngā kupu Ahuriri Advocate mai i te ingoa.

I te tīmatanga ka puta ā-wiki mai te nūpepa nā, ā, i te tau 1861 e rua kē ngā putanga mai i te wiki. I te tau 1871 ka puta mai hei nūpepa o ia rā, ā, i taua tau anō, ka hokona e James Wood. Ko te tokowhā i hoko mai i taua nūpepa nā, he kaimahi katoa rātau o te nūpepa. Ko tētahi o rātau ko William Carlile, ā, ko ia hoki te ētita i whakatūria i te tau 1870.

Ko te Hawke's Bay Weekly Courier he nūpepa ā-wiki i tuhia ki raro i te mana o te Herald. I tīmata mai i te tau 1879, ā, ka tū tonu tae noa ki te tau 1897. Ahakoa i tahuna i te ahi te tari o te Herald i te tau 1886, ka ora tonu ngā nūpepa e rua nei.

I te tau 1926 ka riro mai ngā mīhini tā hou, ā, ka puta mai hoki tētahi nūpepa nui kē atu. Ko te mahi a te Herald, he kaha tonu ki te whakaputa i ngā kaupapa hei whakapai i taua rohe nā. He rite anō hoki tana whakaputa i ngā kaupapa pērā i te hanga i te rērewē mai i Pōneke ki te rohe o Kahungunu ki Heretaunga, me te whakatū hoki i ngā pūnaha paraingaki, paipa wai hoki.

I te rū nui i Ahuriri i te marama o Hui-tanguru i te tau 1931, ka raruraru te Herald ki te tū he nūpepa motuhake. I pēnei hoki nō te mea nā te rū me ngā ahi i whai ake i taua rū, i tahu katoatia te whare perehi i te ahi. Mai i taua wā, nā te nūpepa o Heretaunga, nā te Hawke's Bay Tribune, i tā te Herald. I te marama o Kohi-tātea i te tau 1937, ka whakakotahia aua nūpepa e rua ka puta mai ko te nūpepa kotahi, ā, ko tana ingoa ko te Hawke's Bay Herald-Tribune. Ko te putanga whakamutunga o te Herald, i puta mai i te 16 o Kohi-tātea 1937.

I te tau 1999 ka whakakotahia te Hawke's Bay Herald-Tribune me te nūpepa motuhake o Ahuriri, arā, te Daily Telegraph, ka puta mai ko te Hawke's Bay Today.