Fair Play
Ko Fair Play, i whakaingoa tuaruahia "He hautaka waituhi mō ngā tāne me ngā wāhine whai whakaaro", i whakaputaina ki Pōneke e te kamupene kaitā rongonui a McKee me Gamble mai i te tau 1893 ki te tau 1894.
Ahakoa i rēhitatia hei nūpepa, ko te āhua tōtika kē he pukapuka raupapa whai whakaahua e whakaatu ana i ngā take tōrangapū, ahurea hoki me ngā kohimu, ngā tākaro, ngā pakiwaitara me ngā waituhi whakarōrā o ngā kaitōrangapū, Hōpara i ngā pānuitangata whakarae hoki. I whakaputaina ā-wiki a Fair Play ki Pōneke mai i Whiringa-ā-rangi o 1893 tae noa ki te Paenga-whāwhā o 1894, ā, ka huri kia whakaputaina ā-marama mai i Haratua 1894 ki Whiringa-ā-rangi 1894, arā, te wā i mutu ai te whakaputa.
I whai a Fair Play kia tōkeke kia tū wātea hoki, e kī ai ia "e whakahē ana i ngā momo aukati katoa", ā, kia wātea mai i ngā ringamau me ngā whakamārōrō pononga ki ngā whāinga tōrangapū me ngā whāinga hapori i kitea ake ai e ia e aukati kē ana i te katoa o ngā nūpepa o te motu.
Ahakoa te kī a te nūpepa "he whakaputanga ā-wiki kōaro kore" me tana whakatau ake "he kurupounamu a Fair Play", ka nui anō te pākiwaha. I whakatauhia ake e Fair Play i tōnā putanga tuatahi kia tae ki Hōpara i ngā pānuitangata rongonui ko tōna whāinga "ki te wero hāngai tonu atu mā ngā whakaaro tūmatanui". Hei ahakoa i huri kē mai tēnei kaupapa whakahaere ki te poke i ngā kaiwhakaputa o taua nūpepa. Tērā pea nā te whiwhi o Francis Dillon Bell i tana whakarite kupu whakakino ki a Fair Play i Hui-tangaru o te tau 1894 i ngahoro ai tōna tūranga tūmatanui, pūtea hoki.
Ko te ētita tuatahi, a W. E. Hammond, i tae mai ki Pōneke mai i Ahitereiria i te marama o Pipiri 1893 ki te kawe i taua tūranga, ēngari ka whakawāteahia i Paenga-whāwhā o te tau 1894 i te wā i whakaritea ai kia huri mai i te whakaputanga ā-wiki ki te whakaputanga ā-marama. I riro mā Arthur McKee, te kaiwhakahaere i mua o te nūpepa me tētahi o ana kaiwhakaputa, e kawe te mahi ētita nō te Haratua o te tau 1894. Ko tana kī taurangi, kia puta ake ngā take ā-rohe. Meina i whakaarohia mā tēnei huringa e piki ake ai te āhua o te nūpepa, kīhai i tutuki, ā, i oti te tānga whakamutunga i Whiringa-ā-rangi o te tau 1894.
Kāhore i tino mārama te pūtake mō te ngaromanga o Fair Play. Ahakoa te ōrite o te nūpepa nei ki te nūpepa rongonui o ākarana, arā, te New Zealand Observer, ā, i muri mai ko te New Zealand Free Lance, tērā pea nā te āta whakahīhī, whakarōrā anō hoki o te Fair Play i raru ai.
Ka piki tonu te mahi whai hua a Arthur McKee, ko ia hoki tētahi o ngā kaiwhakahaere o te Cyclopedia o New Zealand me tana kawe tonu i tana hononga i roto i te kamupene whakaputa pukapuka o McKee and Gamble. I kawea ake e W. E. Hammond tētahi tūranga mō te New Zealand Times, ā, ka mahi tonu ki roto i ngā kōrero ā-nūpepa ki ākarana i mua i tana wehenga atu i Aotearoa nei i te tau 1900.
