Press
I whakaputaina e te Press tana putanga ā-wiki tuatahi i te 25 o May 1861 – he pepa e ono ngā whārangi ia Rāhoroi 6d te utu – tekau tau tēnei i muri i te putanga o te Lyttelton Times te niupepa tutahi o Waitaha. Heoi anō i whai ingoa ai te pepa nō te mea i te marama o Maehe 1863, koia te pepa tuatahi o taua rohe kia whakaputaina ā-rā – 5,000 ngā kape o te pepa e whā ana whārangi i tāngia, i hokona ia kape mō te 3d. Nō muri tata mai, i whakakapia ngā tuhinga i te whārangi tuatahi ki ngā pānui.
I te tau 1861, ko te kaitautoko matua ko James Edward FitzGerald, he kaiwhakahaere tuatahi mō Waitaha, he MP hoki mō Lyttelton – ko ia hoki te ētita tuatahi o te Lyttelton Times. I tana hokinga mai ki Waitaha i muri i te wā roa ki Ingarangi i whakahēngia e FitzGerald ngā kaupapa tōtōā, whakaaro nui hoki o tana kaiwhakakapi a William Moorhouse – tae atu ki te arapoka tereina o Lyttleton. Nā runga i te mea e tautokohia ngā kaupapa nui te utu a Moorhouse e te Lyttleton Times, i huri a FitzGerald me ētahi atu tāngata he ōrite ngā whakaaro ki te whakarite pūtea hei tīmata i tētahi niupepa kē e whakahau ana i tētahi kaupapa matakite kē mō Ōtautahi. I te tīmatatanga, i runga i te mea ko FitzGerald te kaituhi o ngā putanga tuatahi, he kaha tana whakahē i a Moorhouse me ana kaupapahere, heoi anō kāore i roa i tīmata te whakamahinga o ngā paerewa mārama, whai tikanga hoki e te niupepa, nō konā, i ngā tau whai muri mai hoki, i whakatūria te ingoa o te Press hei 'pūrongo tika pū' matua ki Aotearoa. Ko tētahi o ngā kaitakoha tuatahi ko Samuel Butler, nāna ētahi tuhinga i tito mō te Press, ā, i muri mai i tuituia atu ki roto i tana pukapuka rongonui Erewhon.
Me kī ko James FitzGerald te kaipupuri tūtahi o te Press mō ētahi tau, ahakoa i te noho nama ia ki ngā kaipakihi matua e rua o Waitaha. I pōturi haere ka mutu hoki ana pānga ki te Press i muri i tana whiwhinga o tētahi tūranga kāwanatanga ki Pōneke i te tau 1867.
Ko te whai i ngā āhuatanga hou te tino whai a ngā kamupene tūmataiti e whakahaere ana i te Press, i runga i ngā pupuritanga-hea rerekē, mō te rau tau whai muri mai. I te tau 1893 i whakaputaina e te Weekly Press, he mea i tīmatangia i te tau 1865 hei pānui pitopito kōrero ki ngā rohe kōraha, tana nama Kirihimete ki tētahi ūwhi toi kua tāngia ki ngā tae-katoa, ā, ko te wā tuatahi hoki i tātuhitia ngā tuhinga ki ngā paraka tae-haurua. I te tau 1917, i tīmata a Mona McKay ki te mahi i te rūma kairīpoata whānui, tētahi o ngā 'wahine kairīpoata' tuatahi i te motu ki te mahi i reira, kua roa tērā he wāhi mā te tāne anake.
Ko ētahi o ngā kaimahi rongonui ko Guy Scholefield, he ētita tuarua o te Press (1903-04), he kaituhi ki Rānana mō te NZ Associated Press (1908-19), ā, i muri i tērā, mō ngā tau 22, ko ia hoki te Parliamentary Librarian ki te General Assembly Library. Ko Oliver Duff te ētita mai i te 1929-1932, ko ētahi o ngā kaitakoha rongonui ko Ngaio Marsh, ko Monte Holcroft me D'Arcy Cresswell. I heke a Duff i tana tūranga i runga i ngā tohenga kaupapahere ētita ki te poari e pā ana ki tētahi taraiki o ngā terēme, i 1939 ko ia te ētita tuatahi o te NZ Listener.
I 1970 i whakarārangihia te Christchurch Press Co. Ltd ki te NZ Stock Exchange, i 1987 i riro te mana whakahaere i te Independent Newspapers Ltd, ā, i 2003 i whakawhitia te kaipupuritanga ki te Fairfax Group.
