Bruce Herald
I tāngia te Bruce Herald i Milton mai i te tau 1864 ki 1971. Koia tētahi o ngā nūpepa taiwhenua i tino roa ai te tānga.
Nā Joseph Mackay te Herald i whakaū arā, he kaihoko pānga pukapuka, he kaitā nūpepa hoki ia nō Ōtepoti. Ko te Herald tētahi o te mekameka nūpepa i whakahaeretia e Mackay i Ōtākou i waenganui i te huinga tau mai i 1860 ki te 1880. Ko ētahi atu nūpepa i whakauru ki taua mekameka ko Te Mataura Ensign i Gore, ko te Clutha Times i Balclutha.
Nā ngā raruraru pūtea i āki i a Mackay kia mahue i a ia te mahi whakatā nūpepa i ngā tau whakamutunga o te tekau tau mai i 1870, ā, i te tau 1879 ka hokona e ia te Herald ki te kamupene o Francis Grant & Co. He nui anō ngā ringa i whakawhitihia ai te nūpepa i roto i ngā tau e rima tekau i muri mai. Ko Reginald Augustus Pyke pea te tino tangata hira o ngā kaihoko tōmuri. He nui tonu ngā wā nā Pyke te nūpepa i whakahaere, i whakatikatika hoki i waenganui i ngā tau 1896 me 1915. He mea māia tonu te titiro whāiti o tōna kaupapa whakapuaki, i tāna whakamahi hoki i te Herald hei āki whakamua i ngā painga ohaoha o Milton me te takiwā o Bruce. Nā āna whakahau, rā ngā whārangi o te Herald, i āwhina kia kukume ai tētahi mira mahi wūru ki te tāone. He maha tonu ngā tau i noho ai ko taua mira tētahi o ngä kaiwhakawhiwhi mahi matua i Milton.
He nui tonu ngā nūpepa tāwhai o te Bruce Herald i Milton i waenganui i ngā tau 1866 me 1910. Ko ngā mea nui rawa ko te Bruce Independent (1866-1867) rāua ko te Milton Mirror (1905-1910). Nā te Independent te tino tauwhāinga mō te wā poto i haere ai ia. I raro i a Edward T. Gillon i riro i taua nūpepa te āro nui o te iwi kāinga mō te tū ārai ki ngā porowini o tōna kaupapa whakapuaki. Anō te pänga o te Independent, i whakarahia e te Herald te tau o ana whārangi mai i te whā ki te waru. Heoi anō he pakari rawa nō ngā whakaaro o Gillon, he kaha rawa rānei nō te whakapuakitanga, ina rā ki te titiro a ngā kaihautū o te Independent, ā, ka katia te nūpepa i te tau 1867. Nā Charles Lewis Grant te Milton Mirror i whakatā, he kaimahi nā te Herald i mua. I angitu pai ai te Mirror ēngari i taumanutia e te Herald i te weratanga o te tari o te Mirror i te ahi i te tau 1910.
Mutu rawa te tānga o te Herald i te 7 o Whiringa-ā-nuku 1971
